هذه صــــــفــــــحتي ،، [.. عاقلة المجانين ..]

[عاقلة المجانين]

عاقلة المجانين في سطور


* نبذة مختصرة عن حياتك خارج النت ؟

* ايام الدوام : شبه روتينية .. اجي من الدوام اجلس مع الوالد والوالده .. بعدين ادخل النت اذا مافيني نوم ولا انام واقوم المغرب نتقهوى سوى حنا وواللي حاضر من اخواني وحريمهم وخواتي .. اذا مافيه احد بعد العشا غالبا اكمل باقي شغلي بالبيت (: الى صلاة الفجر .. تتخللها احيان مشاهده تي في .. او مكالمة هاتف .

* العطلة : ماحبها تطول .. لاني اقوم من النوم اقول وين بتروحون وش بتسوون من بيجيكم ووووالخ .. اذا كنا فاضيين
بالعربي انسانه احب اخطط او اعرف وش بسوي خلال اليوم ..
واذا مافضينا الزواجات والعزايم اللي ورى بعض تزعجني ..

* طبعي ملوله جدا .. ماحب اقابل نفس الاشخاص اكثر من 3 ساعات متواصله .. وماحب اكثر سواليف على غير سنع ..يعني شي مايوسع صدري ماسولف فيه .. شي مالي دخل فيه ماسولف فيه ..
برضه مااحب أجلس بمكان اكثر من ساعه او ساعتين ..

* من عشاق المطاعم والكوفيات .. أحب أجرب كثير .. احب أغامر لكن بحذر ( مو بس بالاكل بكل شي ) ..

* أملك أهل ( ام وأب وأخوان وأخوات وعيالهم وزوجاتهم ) خطيرين .. مدلعيني ومعطيني كل اللي ابي الله يطول باعمارهم بكل شي .. ماحرموني ابد .. الا من البعثه ..

* طموحي عاااالي جدا بشكل مايتصور .. كان عندي طموح اوصل له ومازال ..وان شاء الله احققه .

* انسانه شبه معاندية بس واقعيه .. اذا حطيت براسي شي .. اجيبه .

،،،

* حدثنا عن حضورك من خلال الإنترنت بشكل عام؟
حضور عادي .. مشاركه بمنتديات كثيرة .. حتى بالزعيم اول مافتح شاركت
مشاركتي اغلبها قراءة وتعليقات .. ماحب اكتب مواضيع ..
الا بمنتدى شخصيات ومنتدى سابق كنت اشارك فيه فزعه ليس الا .
الايميل هذا شي مهم جدا .. من اول ماعرفت النت وايميلي هو ايميلي ماغيرته .
مادري عن حضوري انا بالانترنت .. لكن الانترنت حضوره بحياتي خلال السنتين اللي فاتت مهم جدا .. ولا يمكن اجلس يوم بدونه .. ( نرجع لسالفة شغلي بالبيت )

،،،

* متى وكيف كانت أول مرة تستخدم فيها الكمبيوتر (كم عمرك أو في عام كم , او كلهن)؟

ككمبيوتر حاسب آلي اللي نعرفه الحين .. كنت بالابتدائي ثمان سنوات يمكن ..
<<<< كشخه ..
كان اخوي الكبير يدرس بامريكا .. وكان جايب جهازه واول استخدام كان لبرنامج المايك كان فيه صورة ببغاء اذا تكلمنا يطلع صوتنا بس بصورة الببغاء ( ذكريات قسم بالله ) ..

اما الكمبيوتر بشكل عام كمبيوتر صخر .. قبل مانولد الظاهر عندنا واكيد اني قبل المدرسة استخدمته
ولايهون كمبيوتر العائلة والأتاري

،،،

* متى أول مرة دخلت فيها عالم الانترنت وكيف كانت؟
عام 2000 اعتقد كنت ناجحه من اولى ثانوي لثاني ثانوي او من ثالث متوسط لاولى والله ماذكر ..
كان ببيتنا مجموعه اخوان توهم ماعرسوا .. وتقاطوا بجهاز واشتراك .. ومن يد نشيط ليد قوي .. ..
والله العظيم اذكر يتهاوشون .. كل واحد يقول يالله فلان كملت خمس ساعات ..
كانوا ( فضحت باخواني اعرف بس عادي هههههههههههه ) .. كانوا يدخلون برامج الشات ال ام ار سي ( اعتقد اسمه كذا ) وشي اسمه سوالف .. كنت اجي واسنتر عندهم ومايقولون شي ..
وامل واروح ..
اذا فضى الجهاز .. اجي ادخل اقرأ فقط الصفحة الرئيسية حاطين لي الاقلاع لاعبين علي .. كنت اقرأ واتعب واطلع .
جت ثالث ثانوي تادبت ماكنت ادخل كثير ..
برضه ايام الجامعه .. اول سنتين جمعت معدل ( ماشاء الله علي ).. وبعيدن بدت رحلة الانترنت ..
سجلت بالاقلاع عام 2003.. برضه ماكنت اكتب ..صلحلي اخوي ايميلي هذا اللي الحين معي .. وبديت بالايميلات ( الله واكبر يارجاء الصانع ) ..
سجلت بكذا منتدى ..
جربت الشات .. كنت ادخل اتهاوش احيانا وافش خلقي .. باشقائنا من الدول الاخرى المجاورة ( من يقول الكويت )..
الماسنجر نفس الحكاية .. ومازلت ..
لكن كانت تواجهني مشكلة .. ان اغلب صديقاتي .. وقريباتي .. مايستخدمون النت !
خصوصا اللي برى الرياض .
حاليا تطوروا الحمد لله .. صرنا نفلها بالماسنجر .

،،،

* موقف (انترنتي) لا يمكن تنساه؟
بصراحه اول ماقريت السؤال جاء ببالي موقف لكن احب احتفظ فيه لنفسي

لكن بما انه لايمكن انساه .. بقولكم الموقف اللي صار لي قبل 3 او اربع سنوات ماني متاكده ..

المهم خالي فتح منتدى .. وجمع فيه بشر من كل حدب وصوب ..ناس معروفين باسمائهم وناس بيوزراتهم .. ( فيه منهم شعراء وكتاب وصحفيين معروفين ) ..
المهم وكل عيال خوالي وبناتهم واللي اعرفهم هناك .. ..
وكان يلزم علينا نشارك معه .. بس لاني اعرف خالي ماعنده سد .. رفضت الفكرة .. حتى خالتي نفس الشي .. قلتلها ماعندي وقت والله .. ( وفعلا كنت ادرس ذيك الأيام ) ..
المهم واحد من اخواني سجل باسمه الصريح وتوهق ..
والثاني سجل باسم مستعار .. ولا استخدم يوزره ابد ..
طبعا أغلب المنتدى نصراوي .. عاد تعرفون نصروايين كيف مواضيعهم كلها عن الهلال ولو تدور موضوع نصراوي واحد مالقيت ....
المهم مره قلت لاخوي ابي يوزرك .. قال خذيه .. ( طبعا غرضي المنتدى الرياضي واعرف لو اسجل باسم بنت واكتب بالرياضي بينشبون انت ولد اعترف ) ..

سجلت وشاركت .. وجاء الترحيب على أساس اني ولد .. وبديت بالرياضي ..والقسم الجاد .. وكنت رسمية مره بردودي ..(عفوا رسمي مره ) وبالرياضي برضه ارد رد قوي ورسمي .. ويجون البنات من ضمنهم بنت خالي يردون بردود تشجيعيه لي .. على ردي .. بس ماقول شي مسوية ثقل ( عفوا مسوي ثقل ) على ان بنت خالي معهم بس ماحد يدري مين انا ولا احد يدري من الاقارب اني مشاركه ..
وأذكر كاثبات اني ولد .. كتبت موضوع عن اعتزال يوسف الثنيان ودعمته بصور من الملعب .. وايش صار بالملعب .. ( على كلام وتصوير اخواني ) وقدام الناس بالمنتدى كانه انا اللي رايحه ( أقصد رايح )

دخلت المنتدى مره .. لقيت المراقب العام مرسل رساله يقول ابيك تصير مشرف على القسم الرياضي ..
رديت وقلت انا اعتذر مشغول مره .. بدراستي وأشغالي ومااقدر وبعدين انا هلالي متعصب ماقدر اصير مشرف محايد ( لان لو بوافق لازم يكون فيه تواصل بيننا وبين الاداره واستحاله يصير هالشي ) ..
تشكر .. وبعد فتره .. أرسل رساله .. يقول ابي ايميلك .. ( هلا والله وش ادبر عذر هالمره ؟؟ اعطيه ايميل اخوي اللي مسجل فيه بالمنتدى ؟؟ بس لو يسولف هو واخوي عن الهلال والله مايعرف يجاوب لان اخوي ماهو راعي كورة ابد ) ..
اعتذرت اني مادخل ماسنجر او بشكل أصح ماهو عندي البرنامج .. لاني مابي شي يلهيني عن دراستي وشغلي ..

المهم .. عينوا مشرف على القسم الرياضي نصراوي متعصب جدا .. ( ويصير ولد خالتي ) .. بس مثل ماقلت محد يدري اني اعرفهم ..
استقعد لي واستقعدت له كثير بالردود .. .. كنت بجد عاقله بردودي ومنطقيه ( اقصد كنت عاقل ومنطقي ) .. وكانت فيها شوي تعصب لما اشوف متعصب نصراوي قدامي ..

مره من المرات .. جاء وحذف رد لي .. ( عاد بحياتي كلها الانترنيه ماعمري انحذف لي رد او موضوع ) .. انقهرت بجد ..
وعلى طول .. رحت ليوزر خالي .. ..( طبعا لاتجمعت انا وبنت خالي تسولف لي وتقول ليه ماتسجلين .. وكانت تسولف عن واحد هلالي كل صديقاتها منهبلين عليه .. لانه مهبل بالنصراويين ولانه ثقل بالنقاش الجاد وصورته حلوة (انا حاطة صورة هيرثك روشان بالعوارض ) .. وهي تتكلم عني ( عنه ) كنت اضحك .. ومره قلتلها اقولك مين ؟؟
قالت تعرفينه ؟؟ قلت ماعرفه بس اعرف مين ؟
قلت صديق اخوي فلان ..

بعد ماصارت المشكلة مع ولد خالتي النصراوي قلت اولله لاوريك .. وارسل لخالي بالمنتدى .. السالفه وقلت يابو فلان ارجع شف ردي اذا كان علي غلط .. انا اتحمل الحذف .. واذا ماكان غلط .. اتمنى رد اعتباري ..

مامداني ارسل .. الا جايني الرد سم ابشر ولا لك الا اللي يرضيك .. ..

ولا سوو شي .. يوم كامل ..
بعدين لما شفت بنت خالي .. قالت ابوي انهبل ودق على ولد خالتي هزأه وقال ماحطيت مشرف عشان تكره الناس بالمنتدى .. والخ .
قلت مادري ماركزت بمنتداكم الفتره الاأخيره وراحت السالفه ..
جيت بعد فتره لقيتهم منزلينه من الإشراف .. بناء على طلبه .. .. وفي الحقيقه خالي نزله .. عشاني ..

عاد انا لهيت بجد وتركتهم .. وبعد فتره قفلوا منتداهم .. ومن ضمن السواليف بالمنتدى حقهم بيني وبين بنت خالي قبل سنه تقريبا كنا بنام عاد تخبرون سواليف ماقبل النوم..
قلتلها اقولك شي بس توعديني .. ماتعصبين ؟؟ ..
قالت لا والله وش دعوى ؟
قلت تذكرين فلان ؟؟ .. قالت ايه اللي صورته هيرثك ..؟؟ قلت ايه ..

قلت : تراه انا .. ..

قسم بالله نظراتها لي ودها تقوم تصفقني قالت تكذبين .. قلت قسم بالله .. قالت وموضوع يوسف الثنيان من وين الصور ؟ قلت من اخوي فلان ..
على طول دقت على صديقتها قالت شفتي فلان ؟؟ طلع عاقله بنت عمتي وقمات تهاوشها صديقتها وصار بينهم كلام ماقدر اقوله ..

للحين دايم نتذكر الموقف .. قالت تكفين بقول لابوي .. قلت لا الله يخليك انا ماعلمت احد عشان مايمشي خالي ويقول هذي بنت اختي

موقف لايمكن انساه .. وادري لو يدري ولد خالتي بيحقد علي

،،،

* كيف تعرفت على ؟ وكيف كانت بدايتك فيها؟
شخصية من الشخصيات .. لزمت علي ان اشارك معكم .. وشاركت تلبيه للدعوة .
بدايتي ماذكرها والله .
بس اذكر كنت اشارك بالعامة كثير .

،،،

* مالإنطباع الأول لك عن ؟ وماذا تعني لك شخصيات الآن؟
بصراحه ..مثل ماسمعت انها تضم مجموعه سابقة لمنتدى مغلق ( السبورات ) ..
وكنت متخوفه بالبداية ان تستقبلون اي غريب بينكم ..
لكن .. اللي اتضح لي ان الجو العام للمنتدى يسوده حب واحترام ..
ومافيه تفرقه بين الأعضاء .. وهذا اللي اعجبني أكثر ..
سياسة المنتدى بكتابة المواضيع وطرحها اعجبتني ..
تعامل الإدارة السابقة والحالية رائع .. مو مدح بوجيهكم .. لكن حقيقه لابد ان تقال .
الاعضاء والعضوات أكثر من اخوان ..
شخصيات بيتي الانترنتي

،،،

* أكثر الأقسام اللتي تستهويك في ؟
أغلبها .. لكن افضل العامة كثير
اتمنى نلقى فيها نشاط اكثر من الجميع ..

،،،

* مالذي تحرص عليه أكثر من غيره عند كتابة موضوع / رد ؟
ان يكون الموضوع او الرد واقعي ..
بالنسبة للمواضيع أحب أكتب مواضيع شخصية لها علاقة بأحداث صارت لي او شي يضيق صدري بمجتمعنا .
احيان يكون الموضوع فشة خلق .. اذا كنت مره مضغوطه بحياتي خارج النت .

،،،

* موضوع كتبته وأعجبك (اغلى مواضيعك على قلبك)
كل مواضيعي ... لاجد سلسلة فكر معنا ..يمكن هو اكثر موضوع استمتعت فيه .
برضه كل ماوضيع التقارير احبها .. احيانا ارجع اقراها ..
وموضوع التنجيم .. واهلي ماهم اهلي ..

،،،

* موضوع كتبته وتحسفت عليه ؟
مافيه موضوع يصل لدرجة التحسف .. لكن موضوع تقنية النانو .. حسيته بالمنتدى الغلط كتبته ..
برضه فيه موضوع بالصندوق .. تحسفت اني كتبته .

،،،

* رد كتبته وعجبك
ماذكر والله .. بس غالبا ردودي بالعامه .. احبها ..

،،،

* رد كتبته وتحسفت عليه
بعض الردود بالسواليف ..

،،،

* من وجهة نظرك .. مالذي يميز ؟
الجو العام .. والترابط اللي فيه ..

،،،

* كيف ترى شخصيات بعد خمس سنوات من الآن؟

والله ماادري ..

لكن اكيد اتمنى لها التقدم .. وكثرة الأعضاء ومشاركاتهم .

[عاقلة المجانين]

من صفحاتي



مواضيعي





علموني وش بيصير لي " مع عاقله





$$ فـــكــــر.. مــــعـــــنــــا $$





$$ فـــكـــر.. مـــعــــنـــا.. الجــزء الثــانـي .. $$





$$ فكر معنا .. الجزء الأخير $$





ردودي

[SHRek]

قالوا عن [.. عاقلة المجانين ..]



[.. لووووول999 ..]

يوزر نسائي أحرص كثير على قراءة ردها حتى لو يخالفني بالتوجه لكن طرحها وتعاطيها مع الأمور ممتع
كيوزر فيها خفة دم بس بعقل ماهو بهبال
حضورها رغم حداثته إلا أنه طاغي
أشبهها كثير بحضور الموناليزا أيام السبورات
كلا اليوزرين يحمل رجاحة عقل و منطق يجبرك أنك توقف عنده كثير
يمكن ما يميز عاقلة عن غيرها إنها ماشاء الله لاقوة إلا بالله وين ماكتبت تبدع و تمتع بطرحها
لين كتبت بالعامة تبدع إبداع منقطع النظير





[.. SHRek ..]

عاقلة،، من أكثر الشخصيات اتزان في المنتدى
واقعيّة جدا وصريحة .. واللي في قلبها على لسانها
صاحبة حضور مميز .. وردودها لها وزنها .. وخاصة في العامة
متابع لمواضيعها وردودها





[.. magic lady ..]

من وين أبدا ؟؟
عاقلة عضوة أثبتت نفسها في وقت قصيرجداً ..
فرضت احترامها على الجميع ..شخصيتها قوية ماشاء الله ..
واثقة من نفسها ..
واذا كان للتميّز عنوان فهو " عاقلة المجانين" ..
حضور مميز سواء بمواضيع أو ردود ..حضور بالكيف وليس بالكم ..
إضافاتها تجعلنا غالباً ننظر للموضوع من زوايا مختلفة ..
كل من يتابعها يعجب بشخصيتها .. وأنا أولهم
وأفتخر كونها أصبحت بهذا القرب :love ..
بالتوفيق عاقلة





[.. روعه ..]

صريحه , قلتها من زمان وأقولها الحين أحيانا أحسها تقرأ أفكاري وتقول الشي اللي في بالي وتفصل الرد تفصيل





[.. ياحبي لتس ياأنا ..]

عاقله وهي التي لها من اسمها نصيب (الشطر الأول) عاقلة جداً تعجبني آرائها لأني أجزم أنها نابعه من تفكير منطقي واقعي
مرنه بالتعامل .. غيابها يسبب فجوه كبيره من الصعب تجاهلها .. بعيده كل البعد عن الملل في طرحها حتى لو كتبت عشرات الصفحات .





[.. جـgggري ..]

شخصيه حلوه ردود موزونه كلام معقول احسه واقعيه جدا ... تهتم بكل شي اسمه نظام وتكره الفوضا <<<دايم اتخيل عاقله كذا مادري ليه
محبوبه جدا اكتشفت هالشي من مجوكه حسيت انه مره داخله معك اكثر من غيرك وكان معه حق
مواضيعه جدا مميزه خاصه بـ شخصيات صحيه ماشاء الله
غزيزه وغاليه ع الكل طبعا "تعرف حدوده مع جميع الاعضاء وماعمري شفت له رد فيه تعدي(عاقله)"