من أجمل ماقرأت ... ( 2 )

[النوف]

.





تدري وش " يقتل " غيابك ؟!
يقتل إحساسي وعمري !
وين رايح عن عيوني ؟
ليه ؟
تو الناس !
بدري !

إدفن أسراري معاي ..
ما أبي أي شخص يدري
لا تسولف من وراي !
خل يكون الحب " عذري " ..!

وإن سأل عني قليبك ؟!
لا تفكِّر في الجواب !
قول [ إحتاجك ] حبيبك ..
وإنت لاهي بـ الغياب !

من يحبك ..
وش مصيره ؟!
- " يحترق " قلبه أكيد!
تنهي أحلامه الكبيرهـ ..
وتبدي في حبٍ جديد !

ولا يهمك قلب حبّك !
وضحَّى في عمره / عشانك ..
المهم يرتاح قلبك ..
وتلقى في الدنيا / مكانك !

صرت أبعد من منامي !
وكنت أقرب من ثيابك !!
أختصر باقي كلامي ؟!
حيل يقتلني غيابك

[النوف]

.

نكممممممممل

تدري وش سوَّى غيابك ؟!
مـوَّت غيابك سوالف ..!

ما يخوِّفني زماني
بس من فرقاك خايف ..!

فجأه أصحـى ومـا أشوفك ..
لا تهددني ... ظروفك

إعتبرني .. حلم / واقع
وإلاَّ ظلٍ ما يطوفـك

ضاميٍ عطشان .. جيتك
لا يعشمني سرابك ..!

تسمح بكلمه ؟! بغيتك
قبل لا تبدي غيابك ..!

.

[النوف]

.




تدري وش صحَّى " غيابك " ؟
جرح نايم من سنين !
ما ربحت
وما فرحت
جرحي فيني يستهين !

غيبتك كانت خساره
إفهم التعبير زين
من ترك قلبك دياره
وجه جدرانك ( حزين ) !
دمعتي تملي عيوني
عين تسأل فيني عين
تبكي فيني أو بدوني
وضعت بين الدمعتين !

وين أيَّامك يا " غايب " ؟
قلبي يسأل قول وين !!
يا بعد كل الحبايب ..
شوف وش سوى الحنين !
نمت وفي حلمي لقيتك
وقمت أردد كلمتين :
لا تغيب أكثر فديتك
نامت أفراح السنين !

:





.

[النوف]

.




:

ما تدري وش سوى الفراق ؟
أثّر على فصل [ الشتا ] !
لك عندي غيمة إشتياق ،
غيمه على كلمة : متى ؟

مامر بـ غيابك مطر !
كل شي على بالي خطر
حتى حروفي عابره ،
أكتب سطر وأمحي سطر

قلبي طفل توه صغير
بردان بفراقك كثير
وشلون قلبك يتركه
يا صاحب القلب الكبير

خايف عليك من الغياب
الدنيا ~ مليانه [ ذياب ]
و أدري بأنْها ~~ نيّتك
رحلة فراق بْلا إياب

إرجع ولك عندي غلا ،
غيمه على كلمة : هلا
أشتاق لك ، بس السؤال
مشتاق لي ؟
إي وإلا لا ؟

:

.

[النوف]

7
7
7

]

8
8
8

فااااصل

.

[النوف]

8




أجهلك .. و لي سنين اتخيلك
اتمثلك في كل طيف .. والقاك في قسمات ضيف
كل المشاعر له تقول .. حنـّا هلك

أجهلك .. ولي سنين اتخيلك
القاك في بعض الوجيه .. ويمرني طيفك واجيه
يا باكر اللي اجهله .. ارقتني الأسئلة
وابطى العمر يستعجلك ..



أجهلك .. ولي سنين اتخيلك
بالعيوب وبالمزايا .. بالألم
لامن هجرتي يجتاحبي ضلوع وحنايا
اتخيل شكوكك وظنك .. اتخيل التقصير منك
حتى الجفا اتخيله .. وكيف انا باتحمله .. واتحملك



أجهلك .. ولي سنين اتخيلك
وجهك اللي قد حبسته داخلي في غمضة عيوني
واللي ياما قد رسمته .. من عبث طيشي وجنوني
وجهك اللي دوم يظهر لما ألقى نشوة الفكرة الجديدة داهمتني
لما القى انكساراتي قصيدة واكتبتني
وجهك اللي دوم يظهر في اعاصيري وسكوني
في الجبال الشاهقة في أجمل خيالي
في السفوح الخافقة بين نبضي وانفعالي
وجهك اللي قد نحته في عظامي والجوارح
وجهك اللي قد حفظته وبتفاصيل الملاح
بالنهار في بسمته .. بالضيا اللي في ورودة
بالعبوس في غضبته .. بالتضاريس وحدوده
من جنوحه في البها .. لين اقصى نقطة في كاسر جماله
للعذوبة .. من شروق النور في ضيه
للشعر في غروبه
من شطوط الكحل في عيونك لنحرك
من بياض الثلج في خدك لجمر ٍ قاد في ثغرك
وجهك اللي ما ابد يوم لمحته .. او عرفته
لي سنين اتخيله .. واتخيلك
ياللي كلي بك معرفة .. واجهلك
ما اصعبك .. كيف الاقيك
ما اسهلك .. لو الاقيك
ياللي دوم اتخيلك
مملكة حسن الزمن
وأنا الملك

.

[magic lady]

8
8
مؤثرة قصائد الغياب



ودي أختار الليلة درب ..
ما تعرفه ..
ودي اجلس في مكان ..
ما يذكرني بصدفه ..
أو وعد ..
ودي أحكي يا حبيبي .. مع احد ..
غيرك احد ..
لجل النهار .. وحريتي ..
اعطيني .. لحظة اختيار ..
وحدي وغديت أنت الزحام ..
وحدي أبد .. وانت الكلام ..
نورك وما غيره .. ظلام ..
عذب الحروف .. طاغي الطيوف ..
أبعد عن عيوني .. بااشوف ..
لجل النهار .. وحريتي ..
اعطيني .. لحظة اختيار ..
ابي درب .. مايوصلني لدارك ..
ابي وعد .. ماحتمل فيه انتظارك ..
وابي ليل .. مايجي بعده نهارك ..
ودي ادري .. هي حياتي ..
اختياري .. أو اختيارك ..
ودي انسى .. ليله وعدك .. أنسى وعدك .. ماأجيك ..
وش يضرك .. لواخونك .. مره واختارك عليك


- البدر

[النوف]

.


يامن يراعيني بعينه وأراعيــه

بعيون قلبي كل مالاح زولــه

يفز قلبي لا تبدت مواريه

وأغض عنه الطرف والناس حوله

أقعد معه في الناس مقدر أحاكيــه

أخشى لســاني يختلف في مقوله

يغلي الحكي في خطاري مقدر أحكيــه

ويصــرخ بقلبي صمت قد طال طوله

أســـرح بفكــري لا جرى طاري فيــه

لا أقدر أرد الهرج ولا أقدر أقوله

ولا أقدر أفيض ســر قلبي ولا أحكيــه

ولا أقدر أداري له جروح عليــلة

يامن يناديني بقلبه وأناديـــه

يامودع ليلي ليال طــويلة

ينســى الغفى عيني إلا جيت باغيــه

يامن يلوم اللي خلا من خليـــــلة

[النوف]

.

غيمه مرَّت في حياتي .. والرَعَد خوَّف غزال ..
وضاقت الدنيا بـ عيني يا بعد كل " الغوالي " ..!

رحت أدَوْرِك في جنوبي لين وصَّلت الشمال ..
والمصيبه .. إنَّ { قلبي } ما هَرَب منّك وجالي !

هذا آنا .. اللي دوَّرتك وعاااندت "المُحال " ..
ما لقيتك ! وينك إنت ؟! ما لقيتك يا منالي !

إيييه [ ضايق ] من غيابك ومات فيني الإحتمال ..
بس تأكَّد هذا حظي .. وهذا في دنياي فالي ..!

ما شكيت إلا لـ حالي يوم عذَّبني الوصال ..
لمَّا دمَّرني غيابك .. جرحي الأسود طرالي ..!

أدري إنِّك ما تبالي .. و " غيبتك "أكبر مثال ..!
وشي طبيعي لو جرحني قلبك اللي .. ما وُفالي !

وتدري إنِّي مآتحرَّك شامخٍ مثل الـ " جبال " ..!
وماخضعت إلا لـ ربٍ وقت هالضيقه صفالي ..

ياللي تسأل عن جديدي و وين ودَّاني الخيال ..
تحسِب إنِّي بالقصايد أكتب إحساسي .. وأبالي ..

ما دريت ..! إنْهَا حرُوفي كلَّهَا ظيييم الليال ..
وكل قصيده في غيابك قلتَهَا , وآنا لـ حالي ..!

ما سمعها غير " قلبي " .. والله يا ولد الحلال ..
وإلا أنا ما جيت أكتب وآنا في دنياي سااالي !

جيت إلى شاطئ خيالي . . . زايرٍ قصر الرمال ..
وإنصدمت إنَّه تهدَّم ! لاحَرَس يحميه ..و والي !

ودِّي أكتب لك قصيده و ودِّي أرسم لك هلال ..!
صفحتين بـ إيد شاعر مُرهف إحساسه خيالي ..!

القصايد يا حبيبي هي ترى مثل : [العيال] ..
ومن رحلت بعيييد عنِّي .. قمت أتفقَّد عيالي ..!

وين ودَّتك الليالي ؟! هذا هو أصعب سؤال !
وما لقى قلبي إجابه . . . وين ودَّتك الليالي !

ترجف أيامي حبيبي وصارت الفرحه " محُال " ..!
بردك اللي ما رَحَمني.. شوووف منّه وش جرالي !

ما بقى أي شي [ غالي ] .. وضعت في كلمة ( تعال ) ..!
وما ذبحني غير إنِّك . . . . . يا بعد دنياي " غااالي " ..!

لا بغى يتركني قلبك .. تكفى وصَّهـ بالعدال !
إبعد شويَّه .. وإرجع .. وإبعد .. وإقطع وصالي ..!

ليه يعني في البدايه جيت . . يسْبقْك الدلال ؟!
وليه [ تتقهوى ] غرامي وتنثر بـ إيدك " دلالي " ..!

قلت لك : إنَّ المحبه , ما تْحشِم قَدر الرجال ..
لـ إستوى بعين { المحبَّه } الثقل ويَّا هبالي ..!

وقلت لك : نظرة عيونك من علامات الجمال ..!
إستغفر الله .. لا نظرت المُر صار المُر " حالي " ..!

وقلت لك : ما أبي أحبك .. وإنثنى راس العقال !!
قلبي عاندني وحبِّك ..وطااح من راسي [ عقالي ] ..!

تَحْسِب إنَّه زال حبك ؟! لا يا عمري " ما يزال " ..!
صعبه يتغيَّر مكانك . . . وإنت لي أوَّل وتالي ..!

الغنى .. ماهُو حصيلٍ من . . . دنانير ومال ..!
الغنى .. معناه شوفك يا حبيبي وراس مالي ..!

كيف أعزِّل عن ديارك وما قوى قلبي الرحال ؟!
ما صمل قلبي فراقك .. وكانت ديارك " رحالي " ..!

كيف أجاوب من سألني وآنا في حالة .. ضلال ..
وينه عنّك من تحبه ؟! والسؤال بصوت عاالي ..!

قلت ما أسمَع .. وعاد الكلمه مرَّاتـٍـ وقال :
لا إتّهَرَّبْ من سؤالي .. لا إتّهَرَّبْ من سؤالي ..!

وين ودَّته الليالي ؟! حيييل يحرجني [ السؤال ] ..

والمُصيبه إنِّي مدري ..!
وين ودّتك الليالي !!

:

صعبه

[تيتشر]

النوف / ما قرأته من ابداعك بالغياب أسرني سواء أكان من تأليفك أو منقول

كلام جميل واستمتعت بقراءته لعدة مرات

شفتها يا سعود صدفه بعد ما غابت سنين *** عند قسم المختبـر وسط مشفى الجامعـه

جيتها ثم قلت ممكن في سؤالي تسمحين *** ناظـرت فينـي بدهشه نظره متواضعـه

قالت انته تـحسبني من بنات صايعين *** تـحسبني في زماني عن طريقي ضايعـه

قلت انا ماراح اطـول كلبوها كلمتين *** وابعـدت عني شويه ثم جتنـي راجعـه

قالت اسال واضح انك من رجال طيبين *** بس هرجك يالسنـافي كان وشهو دافعـه

قلت انا حبيت وحده يـوم كنا صغيرين *** ومن ثمان سنيـن راحت للمواصل قاطعـه

عقبهـا ماذقـت نـوم يهتنيـه النايمين *** ساهر في طول ليلي لين شـمسي طالعـه

اذكر انه فيه حبه فـوق ثغـره من يمين *** واذكر انه لاجـرينا كـن شعـره تابعـه

واذكر انـه عاشـق الورد والياسمين *** وصار قلبي بالـورود اللي عشقهـا زارعـه

طابعا اسمه بقلبي فيه (سين) وفيه (عين) *** وفيه (الف) وفيه (دال) وسط قلبي طابعه

قاطعتنـي بقولها سبحـان رب العالمين *** كـررتـها مـره .. ومرتين .. ورابعه

قلت وشفيك وشبـلاك يابنيه ترجفين *** ليش عينك يابنيـه من كلامـي دامعـه

قالت الموقف وقلبـي والمحبـه والحنين *** كيف اشوفك بعد ماكنـت عنك قانعـه

قلت انا بسألك ان كانك انتـي تذكرين *** عن مواثيـق ثـمنها من حياتـي دافعـه

قالت ظروف الزمان ماتطيـع العاشقين *** بيعونـي غصب حبك لو هو ماني بايعـه

انا في دنياي حالي كنهـا حال السجين *** حتـى لو فكـوا سراحه فيه شي ٍ مانعـه

زوجوني غصب واحد وحرموني حاجتين *** السعاده فـي زمانـي والحيـاه الرائعـه

والحين انا ام لثلاثه ريـم وياسمين *** والولد اسمه على اسمك والمشاعـر جايعـه ...!!

[النوف]

المشاركة الأصلية كتبت بواسطة تيتشر

النوف / ما قرأته من ابداعك بالغياب أسرني سواء أكان من تأليفك أو منقول

كلام جميل واستمتعت بقراءته لعدة مرات

المشاركة الأصلية كتبت بواسطة تيتشر

يشرفني رأيك ويسعدني ...
الحقيقة ... كله منقول
إلا شيء بسيييط



تحياتي





...




إيه كل الناس عندي
بس مابيهـم بدونك ..!!
تدري يا عمري بأنك..
عندي كل الناس إنت !

.

[magic lady]

من قآل لك في مجتمعنآ مسآواة
.... لآ " يقنعك " ., ولآ تصدّق كلآمه !

آلرجل إذا آخطىَ نسينآ خطآياه
.... و آلبنت إذا أخطت " تقوم القيآمه " !

[النوف]

.

ليت الشمال ان هب ريحه وهبك
تمر كل مامرك الشوق لجلي

تعبان واعلاجي يقولون طبك
ياعنك مايستاهل البعد مثلي

الحب لاعبي مثل مالعبك
لا تنخدع لا شفت صبري وشكلي

اقسم قسم بالله اني احبك
محبتن ماحبها شخص قبلي

جابك غلاك وداخل القلب صبك
مشيت بعروقي وتبخل بوصلي

أوقات تجبرك الظروف
ولا المواقف تغيييب ...

وبعض أوقات تحس كل الناس معك
وأن الدنيا كلها بين ايدينك

وكثير أوقات تحس انك لحالك
ومالك رفيق ...

.

[النوف]

.

اروح؟ ودي/ لكـن لويـن بـاروح
مجروح؟ ادري/ دمع الأعيان فضاح


وحيد؟ خابر/ واقضي الليـل بالنـوح
الهم؟ عِلّه / عِلّـه الصبـح ينـزاح

أروح ... وييين اروح ؟
مجروووح ... أيييه مجروح ؟
وحيييد ... ماجبت جديد ؟

[ليالي]

انا قلب خفاق
فى دنيا الاشواق
انا روح هيمان
فى وادى الاشجان


\
\
\